რექტორი
დავით გურგენიძე
აკადემიკოსი, პროფესორი, საქართველოს დამსახურებული მშენებლი,
საქართველოს ტექნიკური უნივერსიტეტის რექტორი
დაიბადა 1963 წლის 16 ოქტომბერს თბილისში. 1981-1983 წლებში სწავლობდა ქ. მოსკოვის ვ. კუიბიშევის სახელობის საინჟინრო-სამშენებლო ინსტიტუტში, 1983-1987 წლებში – საქართველოს პოლიტექნიკურ ინსტიტუტში ჰიდროტექნიკისა და სანტექნიკის ფაკულტეტზე (მიენიჭა ინჟინერ-ჰიდროტექნიკოსის კვალიფიკაცია), 1999-2002 წწ. – საქართველოს ტექნიკური უნივერსიტეტის სამართლის ფაკულტეტზე (მიენიჭა სამოქალაქო სამართლის მაგისტრის ხარისხი).
2006-იდან არის საქართველოს ენერგეტიკის აკადემიის ნამდვილი წევრი, 2019-იდან – საქართველოს საინჟინრო აკადემიის ნამდვილი წევრი, 2021-იდან არჩეულია საქართველოს იურიდიული აკადემიის ნამდვილ წევრად. 2023 წელიდან დავით გურგენიძე არის საქართველოს მეცნიერებათა ეროვნული აკადემიის აკადემიკოსი.
დავით გურგენიძის პროფესიული გამოცდილება მოიცავს როგორც საქართველოში, ისე საზღვარგარეთ დადგმული სიმძლავრეების (ჰიდროენერგეტიკული, ჰიდრომელიორაციული ჰიდროკვანძებისა და თბოელექტროსადგურების) საექსპლუატაციო ანალიზსა და მონიტორინგს, აგრეთვე სხვადასხვა ენერგეტიკული, სამოქალაქო და სამრეწველო ობიექტის მშენებლობა-რეკონსტრუქციაში მონაწილეობას.
1980 წ. მუშაობა დაიწყო ქ. მცხეთის სამრეწველო კომბინატში მუშად. 1980–1981 წწ. იყო საქართველოს სოფლის მშენებლობის სამინისტროს №9 ტრესტის ზეინკალი; 1983–1987 წწ. – ენგურჰესის მშენებლობაზე, სამშენებლო რაზმების მეთაური; 1985–1990 წწ. – სპი‐ის ჰიდროტექნიკისა და სანტექნიკის ფაკულტეტის კომკავშირის კომიტეტის მდივანი, სპი‐ის კომკავშირის კომიტეტის მდივნის მოადგილე, თბილისის საქალაქო კომიტეტის მეცნიერებისა და ტექნიკის განყოფილების გამგე; 1990–1993 წწ. – სამეცნიერო‐საწარმოო გაერთიანება „კომპლექსის“ გენერალური დირექტორის მოადგილე (ქ. თბილისი); 1992–1994 წწ. – სს „ზოდიაქოს“ პრეზიდენტი (ქ. მოსკოვი); 1993–97 წწ. – Ltd DIVA-ს გამგეობის თავმჯდომარე (ქ. ვენა, ავსტრია); 1994–1996 წწ. – თეორიული და ექსპერიმენტული ფიზიკის ინსტიტუტის (ქ. მოსკოვი) მეცნიერი თანამშრომელი (სახელშეკრულებო თემა); 1997–1998 წწ. – სტუ‐ის წყალმომარაგებისა და კანალიზაციის კათედრის გამგის მოადგილე; 1997–2001 წწ. – სს „მერკური – 92-ის“ გენერალური დირექტორი (ქ. თბილისი); 1998–2001 წწ. – სტუ‐ის წარმოებისა და ბიზნესის ხელშემწყობი „TEMPUS TACIS“‐ის საერთაშორისო ცენტრის ხელმძღვანელი; 2001–2003 წწ. – სტუ‐ის ჰიდროსაინჟინრო ფაკულტეტის სახელმწიფო საგამოცდო კომისიის თავმჯდომარე; 2001–2004 წწ. – საქართველოს სათბობ-ენერგეტიკის მინისტრის მოადგილე, კურირებდა ჰიდროენერგეტიკული მშენებლობის მიმართულებას, სადაც მისი ინიციატივითა და უშუალო ხელმძღვანელობით მრავალი სამეცნიერო-საპროექტო და პრაქტიკული, ინოვაციური საქმიანობის რეალიზაცია მოხდა.
2002–2005 წწ. იყო სტუ‐ის წყალმომარაგებისა და კანალიზაციის კათედრის მეცნიერი‐თანამშრომელი; 2005–2011 წწ. – საქართველოს საინჟინრო აკადემიის მრჩეველი; 2006–2007 წწ. – სტუ‐ის ენერგეტიკისა და ტელეკომუნიკაციის ფაკულტეტის, თბოტექნიკისა და ჰიდროენერგეტიკის დეპარტამენტის მოწვეული სპეციალისტი; 2012–2013 წწ. – სტუ‐ის სამშენებლო ფაკულტეტის წყალმომარაგების, წყალარინების, თბოაირმომარაგებისა და შენობათა საინჟინრო აღჭურვის დეპარტამენტის მოწვეული სპეციალისტი; 2013-იდან – სტუ‐ის სასწავლო პროცესის მონიტორინგის დეპარტამენტის უფროსი; 2015–2017 წწ. – სტუ‐ის სამშენებლო ფაკულტეტის დეკანის მოვალეობის შემსრულებელი; 2017–2018 წწ. – სტუ‐ის სადოქტორო საგანმანათლებლო პროგრამა „ჰიდროინჟინერიის“ ხელმძღვანელი; 2017–2020 წწ. – საქართველოს ტექნიკური უნივერსიტეტის სამშენებლო ფაკულტეტის დეკანი. დავით გურგენიძე კოორდინაციას უწევს და თავადაც აქტიურადაა ჩართული სამეცნიერო საქმიანობაში, რომელიც ეხება ზოგადად მშენებლობის ინდუსტრიისა და კონკრეტულად ჰ/ტ ნაგებობების მნიშვნელოვან საკითხებს: სამშენებლო მასალების საფუძვლიან კვლევებს; დაპროექტებისა და სამუშაოების წარმოების პროცესებს; კაშხლების, გვირაბების, წყალმიმღებ ნაგებობათა სეისმომედეგობის საკითხებს; საქართველოში მშენებარე ჰიდროტექნიკური ნაგებობების საპროექტო და საექსპლუატაციო შეფასებებს.
2017-იდან არის საქართველოს პარლამენტის რეგიონალური პოლიტიკისა და თვითმმართველობის კომიტეტთან არსებული სამეცნიერო‐საკონსულტაციო საბჭოს წევრი; 2020-იდან – საქართველოს ტექნიკური უნივერსიტეტის რექტორი; 2021-იდან საქართველოს პრეზიდენტის N 01/10/01 განკარგულებით – საქართველოს ეროვნული პრემიის კომისიის წევრი; 2022 წლის 15 ივნისიდან – საქართველოს ტექნიკური უნივერსიტეტის საინჟინრო-ტექნოლოგიური და საბუნებისმეტყველო საუნივერსიტეტო სადისერტაციო საბჭოს თავმჯდომარე.
იგი 105-ზე მეტი სამეცნიერო ნაშრომის, მათ შორის 2 გამოგონების, 7 მონოგრაფიის, 7 სახელმძღვანელოს, 5 დამხმარე სახელმძღვანელოსა და 1 ენციკლოპედიური ლექსიკონის (Vტომი) ავტორია, კოორდინაციას უწევდა 3 საერთაშორისო საგრანტო პროექტს. მისი ხელმძღვანელობით დაცულია 7 სადოქტორო დისერტაცია.
დავით გურგენიძის აქტიურ საერთაშორისო სამეცნიერო-პედაგოგიურ საქმიანობაზე მიუთითებს ისიც, რომ იგი არის აკადემიკოს ი. ეგიაზაროვის სახელობის წყლის პრობლემებისა და ჰიდროტექნიკის ინსტიტუტის (სომხეთის რესპუბლიკა, 2019 წ.), ბელოსტოკის ტექნიკური უნივერსიტეტის (პოლონეთი, 2020 წ.), უკრაინის ნაციონალური საავიაციო უნივერსიტეტის (2021 წ.), სომხეთის არქიტექტურისა და მშენებლობის ნაციონალური უნივერსიტეტის (2021 წ.) საპატიო დოქტორი.
2022-იდან საქართველოს მეცნიერებათა ეროვნული აკადემიის პრეზიდენტის N02/30 ბრძანებით არის საქართველოს მეცნიერებათა ეროვნული აკადემიის პრეზიდიუმის ასოცირებული წევრი. 2023-იდან რექტორთა მუდმივმოქმედმი კონფერენციის თავმჯდომარე. 2023-იდან საქართველოს მეცნიერებათა ეროვნული აკადემიის პრეზიდიუმის წევრი.
დავით გურგენიძე სტუდენტი-ახალგაზრდობის აღზრდაში შეტანილი პირადი წვლილისათვის საქართველოს პრეზიდენტის 1999 წლის 21 დეკემბრის N1518 განკარგულებით დაჯილდოვდა ღირსების ორდენით.
ჟურნალისტთა საერთაშორისო ფონდმა პროფესორ დავით გურგენიძეს 2007 წლის 24 მაისს საქველმოქმედო საქმიანობისა და კაცთმოყვარეობისათვის „ოქროს ფრთა“ გადასცა. 2019 წ. მიენიჭა საქართველოს დამსახურებული მშენებლის წოდება.
2022 წლის 16 თებერვალს დაჯილდოვდა ლიეტუვის რესპუბლიკის სახელმწიფო ორდენით – „დამსახურება ლიეტუვისთვის“ რაინდის ჯვრით, 2023 წლის 5 მაისს კი – დანტე ალიგიერის საზოგადოების ოქროს მედლითა და დიპლომით (იტალია).
ჰყავს მეუღლე და ორი შვილი.
ელ.ფოსტა: gurgenidzedavid@gtu.ge
