საგანმანათლებლო პროგრამა (კურიკულუმი) არის უმაღლესი განათლების კვალიფიკაციის მისაღებად აუცილებელი სასწავლო კურსების/მოდულების ერთობლიობა, რომელშიც მოცემულია პროგრამის მიზნები, სწავლის შედეგები, სასწავლო კურსები/მოდულები შესაბამისი კრედიტებით სტუდენტთა შეფასების სისტემა და სასწავლო პროცესის ორგანიზების თავისებურებები.

მოდული სწავლების დამოუკიდებელი თანამიმდევრული ბლოკია, რომელიც აერთიანებს მონათესავე საგნებს. მოდულში განსაზღვრულია საგანთა ურთიერთკავშირები და თანამიმდევრობა. რამდენიმე მოდული შეადგენს სასწავლო გეგმას.

კრედიტი არის ერთეული, რომელიც გამოხატავს სტუდენტისთვის საჭირო სასწავლო დატვირთვას და რომლის მიღებაც შესაძლებელია სწავლის შედეგების მიღწევის შემდეგ. საქართველოს ტექნიკურ უნივერსიტეტში ერთი კრედიტი (ECTS) უტოლდება სტუდენტის სასწავლო საქმიანობას (სტუდენტის დატვირთვას) 25 საათის განმავლობაში და მოიცავს როგორც საკონტაქტო, ისე დამოუკიდებელ საათებს.

ECTS არის ევროპული კრედიტების ტრანსფერისა და დაგროვების სისტემა.

ავტორიზაცია არის უმაღლესი საგანმანათლებლო დაწესებულების სტატუსის მოპოვების პროცედურა, რომლის მიზანია სახელმწიფოს მიერ აღიარებული განათლების დამადასტურებელი დოკუმენტის გასაცემად შესაბამისი საქმიანობის განხორციელებისთვის აუცილებელი სტანდარტების დაკმაყოფილების უზრუნველყოფა.

აკრედიტაცია არის აკარედიტაციის სტანდარტებთან უმაღლესი საგანმანათლებლო დაწესებულების საგანმანათლებლო პროგრამის შესაბამისობის განსაზღვრის პროცედურა, რომლის მიზანია, განათლების ხარისხის ასამაღლებლად სისტემური თვითშეფასების დამკვიდრება და ხარისხის უზრუნველყოფის მექანიზმების განვითარების ხელშეწყობა, რომელთანაც დაკავშირებულია სახელმწიფო დაფინანსების მიღება, ასევე კანონით გათვალისწინებული ზოგიერთი საგანმანათლებლო პროგრამის განხორციელება.

სტუდენტი არის პირი, რომელიც კანონითა და უმაღლესი საგანმანათლებლო დასწესებულების წესდებით განსაზღვრული წესით ჩაირიცხა და სწავლობს უმაღლესი საგანმანათლებლო დაწესებულების ბაკალავრიატის, მაგისტრატურის და დოქტორანტურის საგანმანათლებლო პროგრამების გასავლელად.

მობილობა არის სტუდენტთა და აკადემიური პერსონალის თავისუფალი გადაადგილება სწავლის, სწავლების და კვლევის პროცესებში მონაწილეობის მისაღებად როგორც საქართველოში, ისე უცხოეთში, საქართველოს განათლებისა და მეცნიერების მინისტრის მიერ დადგენილი წესით, რასაც თან სდევს კვალიფიკაციის ან სწავლის პერიოდში მიღებული განათლების და კრედიტების აღიარება.

აკადემიური განათლება არის უმაღლესი განათლების კურსი, რომელიც შეიცავს ბაკალავრიატის, მაგისტრატურის და დოქტორანტურის საგანმანათლებლო პროგრამებს.

ბაკალავრიატი არის აკადემიური უმაღლესი განათლების პირველი საფეხურის საგანმანათლებლო პროგრამა, რომელიც ითვალისწინებს შესაბამისი სპეციალობის საფუძვლების სწავლებას, რაც აუცილებელია პირის მიღებული კვალიფიკაციით მუშაობისთვის და მაგისტრატურაში შემდგომი სწავლისთვის.

ბაკალავრი არის მფლობელი იმ აკადემიური ხარისხისა, რომელშიც პირს აკადემიური უმაღლესი საგანმანათლებლო პროგრამის პირველი საფეხურისთვის - ბაკალავრიატისთვის დადგენილი კრედიტების რაოდენობის ათვისების შედეგად ენიჭება.

მაგისტრატურა აკადემიური უმაღლესი განათლების მეორე საფეხურის საგანმანათლებლო პროგრამაა, რომელიც მოიცავს სამეცნიერო კვლევის ელემენტებს და მიზნად ისახავს ბაკალავრის შემდგომი დონის სპეციალისტის ან მკვლევარის მომზადებას, აგრეთვე პირს ამზადებს მიღებული კვალიფიკაციით მუშაობისთვის.

მაგისტრი არის მფლობელი იმ აკადემიური ხარისხისა, რომელიც პირს აკადემიური უმაღლესი განათლების მეორე საფეხურისთვის - მაგისტრატურისთვის დადგენილი კრედიტების რაოდენობის ათვისების შედეგად ენიჭება.

დოქტორანტურა არის აკადემიური უმაღლესი განათლების მესამე საფეხურის საგანმანათლებლო პროგრამა, სასწავლო და სამეცნიერო-კვლევითი კომპონენტების ერთობლიობა, რომელიც მიზნად ისახავს სამეცნიერო კადრის მომზადებას და მთავრდება დოქტორის აკადემიური ხარისხის მინიჭებით.

დოქტორი არის მფობელი იმ აკადემიური ხარისხისა, რომელიც პირს დოქტორანტურისათვის გათვალისწინებული კომპონენტების შესრულებისა და დისერტაციის დაცვის შედეგად ენიჭება.

დისერტაცია არის სამეცნიერო ნაშრომი, რომელსაც დოქტორანტი იცავს დოქტორის აკადემიური ხარისხის მოსაპოვებლად.

კვალიფიკაცია არის სწავლის შედეგი, რომელიც მიიღწევა უმაღლესი საგანმანათლებლო პროგრამის დაძლევით და დასტურდება უმაღლესი საგანმანათლებლო დაწესებულების მიერ გაცემული დიპლომით ან სერტიფიკატით.

აკადემიური ხარისხი არის კვალიფიკაცია, რომელსაც პირს აკადემიური უმაღლესი განათლების შესაბამისი საფეხურის დამთავრებისას ანიჭებს უმაღლესი საგანამანათლებლო დაწესებულება ან მართმადიდებელი საღვთისმეტყველო უმაღლესი საგანმანათლებლო დაწესებულება.

დიპლომი არის უმაღლესი საგანმანათლებლო დაწესებულების მიერ მინიჭებული კვალიფიკაციის დამადასტურებელი დოკუმენტი.

დიპლომის დანართი არის დოკუმენტი, რომელსაც დიპლომთან ერთად გასცემს უმაღლესი საგანმანათლებლო დაწესებულება სტუდენტის მიერ მიღებული განათლების შინაარსის უმაღლესი საგანმანათლებლო დაწესებულების მიერ მინიჭებული კვალიფიკაციის დასადასტურებლად.

უნივერსიტეტი უმაღლესი საგანმანათლებლო დასწესებულებაა, რომელიც ახორციელებს სამივე საფეხურის უმაღლეს საგანმანათლებლო პროგრამებს და სამეცნიერო კვლევებს.

აკადემიური საბჭო საჯარო სამართლის იურიდიული პირის უმაღლესი საგანმანათლებლო დაწესებულების უმაღლესი წარმომადგენლობითი ორგანოა.

წარმომადგენლობითი საბჭო (სენატი) საჯარო სამართლის იურიდიული პირის - უმაღლესი საგანმანათლებლო დაწესებულების წარმომადგენლობითი ორგანოა.

სადისერტაციო საბჭო დოქტორის აკადემიური ხარისხის მიმნიჭებელი ორგანოა. საჯარო სამართლის იურიდიულ პირში სადისერტაციო საბჭო შეიძლება არსებობდეს ძირითად საგანმანათლებლო ერთეულში ან უნივერსიტეტში.

რექტორი სახელმწიფოს მიერ დაფუძნებული უმაღლესი საგანმანათლებლო დაწესებულების ხელმძღვანელია; საჯარო სამართლის იურიდიულ პირში - უმაღლეს საგანმანათლებლო დაწესებულებაში - აგრეთვე აკადემიური საბჭოს თავმჯდომარე.

ადმინისტრაციის ხელმძღვანელი (კანცლერი) არის ფინანსური, მატერიალური და ადმინისტრაციული რესურსების მართვის სფეროში უმაღლესი საგანმანათლებლო დაწესებულების ადმინისტრაციის ხელმძღვანელი.

პროფესორი უმაღლესი საგანამანათლებლო დაწესებულების აკადემიური თანამდებობის მქონე პირია, რომელიც უძღვება სასწავლო პროცესს და ხელმძღვანელობს სტუდენტთა სამეცნიერო-კვლევით მუშაობას.

ასოცირებული პროფესორი არის უმაღლესი საგანმანათლებლო დაწესებულების აკადემიური თანამდებობის მქონე პირი, იგი მონაწილეობს სასწავლო პროცესში და ხელმძღვანელობს სტუდენტებს სასწავლო და სამეცნიერო-კვლევით მუშაობას.

ასისტენტ-პროფესორი არის უმაღლესი საგანმანათლებლო დაწესებულების აკადემიური თანამდებობის მქონე პირი, რომელიც თავისი კომპეტენციის შესაბამისად მონაწილეობს სასწავლო და სამეცნიერო-კვლევით პროცესში.

ასისტენტი არის უმაღლესი საგანმანათლებლო დაწესებულების აკადემიური თანამდებობის მქონე პირი, რომელიც ძირითადად საგანმანათლებლო ერთეულში მიმდინარე სასწავლო პროცესის ფარგლებში ახორციელებს სასემინარო და კვლევით სამუშაოებს პროფესორის, ასოცირებული პროფესორის ან ასისტენტ-პროფესორის ხელმძღვანელობით.

უმაღლესი განათლების კვალიფიკაციათა ჩარჩო არის ეროვნული საკვალიფიკაციო ჩარჩოს შემადგენელი დოკუმენტი, რომელშიც სისტემატიზებულია საქართველოში არსებული უმაღლესი განათლების ყველა კვალიფიკაცია.

ხარისხის უზრუნველყოფა შიდა და გარე შეფასების პროცედურებია, რომელთა განხორციელება ხელს უწყობს უმაღლეს საგანმანათლებლო დაწესებულებაში განათლების ხარისხის გაუმჯობესებას.

სტუდენტი ვალდებულია სასწავლო წლის დაწყებამდე არანაკლებ ორი კვირით ადრე დეკანატში გაიაროს ადმინისტრაციული (საფინანსო ხელშეკრულება/ან სწავლების საფასურის გადახდა) და აკადემიური (სასწავლო ხელშეკრულების გაფორმება) რეგისტრაცია

სწავლის საფასურს იხდით თიბისი ბანკის ფილიალებში, რეკვიზიტები მითითებულია საფინანსო ხელშეკრულებაში (შეგიძლიათ აიღოთ ბუღალტერიაშიც, აგრეთვე ნახოთ სტუ-ს ვებგვერდზე).

ფორმა 26 არის სამხედრო განყოფილებაში წარსადგენი ცნობა, რომლის გაცემა შესაძლებელია სტუ-ს ადმინისტრაციულ კორპუსში, სამხედრო-სამობილიზაციო განყოფილებაში

საბაკალვრო პროგრამის ხანგრძლივობაა ოთხი წელი.

ბაკალავრის ხარისხის მისაღებად საჭიროა 240 კრედიტის დაგროვება.

ბაკალავრიატის დამთავრების შემდეგ სტუდენტს ენიჭება ბაკალავრის აკადემიური ხარისხი (ბაკალავრი).

სემესტრის განმავლობაში ტარდება ერთი შუასემესტრული გამოცდა (ტესტირება) და ერთი დასკვნითი გამოცდა.

სტუდენტის სწავლის შედეგის შეფასების მაქსიმალური ქულაა 100.

მინიმალური დადებითი შეფასებაა 51 ქულა.

თუ სტუდენტს დამატებით (ხელახლა) აქვს გასავლელი სასწავლო კურსები, მან სასწავლო და საფინანსო ხელშეკრულების გაფორმების წინ დეკანატში უნდა მიიღოს კონსულტაცია.

სტუდენტს აქვს უფლება დაიმატოს სემესტრი: ბაკალავრიატში – არაუმეტეს 4 სემესტრისა, მაგისტრატურასა და დოქტორანტურაში – არაუმეტეს 2 სემესტრისა.

მაგისტრატურაში ჩარიცხვა ხორციელდება საერთო სამაგისტრო გამოცდებისა და სტუ-ს მიერ ორგანიზებული სასპეციალიზაციო გამოცდების ჩაბარების შედეგად. მაგისტრატურაში ჩარიცხვის უფლება აქვს არანაკლებ ბაკალავრის ან მასთან გათანაბრებული აკადემიური ხარისხის მქონე პირს.

მაგისტრატურის სასპეციალიზაციო გამოცდა ტარდება უნივერსიტეტში, რექტორის ბრძანებით დადგენილ დროს და ადგილზე.

დოქტორანტურაში ჩარიცხვის და სწავლის უფლება აქვს მაგისტრის ან მასთან გათანაბრებული აკადემიური ხარისხის მქონე პირს.

დოქტორანტურაში მიღება ხორციელდება უნივერსიტეტის ფარგლებში, რექტორის ბრძანებით დადგენილ დროს და ადგილზე.

მობილობა ხორციელდება სასწავლო წლის განმავლობაში ორჯერ. გარე მობილობის შემთხვევაში საჭიროა განათლების ხარისხის ეროვნული ცენტრის პორტალზე რეგისტრაციის გავლა და შემდგომ სტუ-ში დოკუმენტაციის წარმოდგენა. შიდა მობილობას ახორციელებს სტუ-ს სწავლების დეპარტამენტი ფაკულტეტების დეკანატების მონაწილეობით.

შიგა მობილობა ხორციელდება სასწავლო წლის განმავლობაში ორჯერ. შიდა მობილობის ადმინისტრირებას ახორციელებს სტუ-ს სწავლების დეპარტამენტი ფაკულტეტების დეკანატების მონაწილეობით.

სტუდენტის სტატუსის შეჩერებად განიხილება სტუ–სა და სტუდენტის უფლება-მოვალეობების შესრულებისგან გათავისუფლება სტუდენტის სტატუსის შეწყვეტის გარეშე.

სტუდენტის სტატუსის აღდგენა ხდება სწავლის დაწყებამდე ორი კვირით ადრე, სტატუსშეჩერებული სტუდენტის მიერ დეკანის ხელმოწერილი განცხადების და თანდართული დოკუმენტაციის წარმოდგენის შემდეგ.

გაცვლითი პროგრამების თაობაზე უნდა მიმართოთ სტუ-ს საერთაშორისო ურთიერთობების და სტანდარტების სამსახურს (ადმინისტრაციული კორპუსი, მე-2 სართული).

დიპლომის და მისი დანართის მიღება შესაძლებელია სტუ-ს ადმინისტრაციული კორპუსის მე-2 სართულზე, დიპლომების დეპარტამენტში.

არდადეგების ვადები განისაზღვრება რექტორის ბრძანებით სასწავლო სემესტრის განრიგის შესახებ.