საქართველოს ტექნიკურ უნივერსიტეტსა და სსიპ საქართველოს ინტელექტუალური საკუთრების ეროვნულ ცენტრ - „საქპატენტს“ შორის

2018 წლის 18 იანვარს ხელი მოეწერა ურთიერთანამშრომლობის მემორანდუმს საქართველოს ტექნიკურ უნივერსიტეტსა და სსიპ საქართველოს ინტელექტუალური საკუთრების ეროვნულ ცენტრ - „საქპატენტს“ შორის.
ურთიერთანამშრომლობის მიზანი: ინტელექტუალური საკუთრების დაცვის სფეროში ინოვაციებისა და ტექნოლოგიების დარგის პოპულარიზაციისა და განვითარებისკენ მიმართული ერთობლივი პროგრამების დაგეგმვა და განხორციელება, აგრეთვე, საჯარო მმართველობის საგანმანათლებლო პროგრამების მიმართულებით სტუდენტების პროფესიული განვითარების ხელშეწყობა და დარგთაშორისი სამეცნიერო ან/და შემეცნებითი პროექტების ერთობლივად განხორციელებაა.
ხელმოწერის ცერემონიაზე საქართველოს ტექნიკური უნივერსიტეტის რექტორი, აკადემიკოსი არჩილ ფრანგიშვილი მიესალმა უნივერსიტეტის ბიზნეტექნოლოგიების ფაკულტეტის საჯარო მმართველობისა და ელექტრონული ბიზნესის დეპარტამენტის ინიციატივას „საქპატენტთან“ თანამშრომლობის თაობაზე. მან აღნიშნა, რომ ტექნოლოგიების დანერგვის მენეჯმენტი თანამედროვე გამოწვევაა და ამ მიმართულებით სტუდენტთა კვალიფიკაცია სწორედ რომ ტექნიკური უნივერსიტეტის პროფილია.
„საქპატენტის“ ხელმძღვანელმა ნიკოლოზ გოგილიძემ ისაუბრა ინტელექტუალური საკუთრების დაცვის სააგენტოს მიღწევებსა და მნიშვნელობაზე. მან აღნიშნა, რომ ამ სფეროში ნორმატიული ბაზა მეტ-ნაკლებად მოწესრიგებულია, სააგენტოში რეგისტირებულია ასობით პატენტი, სუსტი წერტლია მათ შორის კავშირების სისტემა, ამიტომ ტექნიკური უნივერსიტეტის ინიციატივა ამ რთული გამოწვევის პირობებში მისასალმებელია. ნიკოლოზ გოგილიძემ სტუდენტების სტაჟირებასა და გამოყენებითი ცოდნის დანერგვის სფეროში ერთობლივ კონფერენციებსა და სემინარების ჩატარებასაც გაუსვა ხაზი.
მხარეები შეთანხმდნენ, რომ საჯარო მმართველობის საგანმანათლებლო პროგრამის მიმართულებით სასწავლო პროგრამები ინტელექტუალური საკუთრების დაცვის პრაქტიკული კურსითაც შეივსება, რაც უდაოდ ხელს შეუწყობს სტუდენტთა დასაქმებას ამ მიმართულებით.