03/02/2017
შეხვედრა ტექნიკური უნივერსიტეტის ბიზნესტექნოლოგიების ფაკულტეტზე
21 თებერვალს საქართველოს ტექნიკურ უნივერსიტეტს სტუმრობდა საქართველოს პარლამენტის განათლების, მეცნიერებისა და კულტურის კომიტეტის თავმჯდომარე, მარიამ ჯაში. სტუმარმა ტექნიკური უნივერსიტეტის რექტორთან, აკადემიკოს არჩილ ფრანგიშვილთან და უნივერსიტეტის ადმინისტრაციის ხელმძღვანელთან, პროფესორ ქეთი ქოქრაშვილთან ერთად მონაწილეობა მიიღო საჯარო მმართველობისა და ელექტრონული ბიზნესის დეპარტამენტის ბაკალავრიატის სტუდენტების მიერ მოწყობილ პარლამენტის იმიტირებულ სხდომაში (კურსის ხელმძღვანელი – პროფესორი მარიამ ცაცანაშვილი). სტუდენტების მიერ ჩატარებული იმიტირებული სხდომა იყო გავლილი სასწავლო კურსის – „საკონსტიტუციო სამართლის“ ერთგვარი პრაქტიკული შეჯამება.
„პარლამენტის სხდომის“ დასრულების შემდგომ სტუმარი შეხვდა სტუდენტთა და პროფესორ-მასწავლებელთა წარმომადგენლებს, გაიმართა გულახდილი საუბარი უმაღლესი განათლების აქტუალური პრობლემების ირგვლივ. ქალბატონმა მარიამ ჯაშმა უპასუხა შეხვედრის მონაწილეთა მრავალ შეკითხვას. შეხვედრას ასევე ესწრებოდნენ: ბიზნეს ტექნოლოგიების ფაკულტეტის დეკანი პროფესორი რუსუდან ქუთათელაძე, საჯარო მართველობისა და ელექტრონული ბიზნესის დეპარტამენტის ხელმძღვანელი პროფესორი გენადი იაშვილი, ივანე ჯავახიშვილის სახელობის თბილისის სახელმწიფო უნივერსიტეტის ადმინისტრაციის ხელმძღვანელი, სტუ-ს პროფესორი ნუნუ ოვსიანიკოვა, სტუ-ს სწავლების დეპარტამენტის უფროსი, პროფესორი იური ლომიძე და სხვა პასუხისმგებელი მუშაკები.
