მივლინება თურქეთში

2023 წლის 29 მაისიდან 2 ივნისის ჩათვლით თურქეთის ქალაქ უშაკში - უშაკის უნივერსიტეტში (Uşak University, Turkiye) Erasmus+ პროგრამის ფარგლებში ჩატარდა პერსონალის მე-4 საერთაშორისო კვირეული თემაზე: „ხარისხის უზრუნველყოფა განათლებისა და კვლევის თანამშრომლობაში“.

საერთაშორისო კვირეულში მონაწილეობდნენ მსოფლიოს 15 ქვეყნის უმაღლესი სასწავლო დაწესებულებების 60-მდე წარმომადგენელი. საქართველოს ტექნიკური უნივერსიტეტიდან აღნიშნულ კვირეულში მონაწილეობა მიიღო ბიზნესტექნოლოგიების ფაკულტეტის პროფესორმა მედეა ჭელიძემ.

ღონისძიების გახსნის ცერემონიაში, რომელიც გაიმართა კონგრესებისა და კულტურის ცენტრის დიდ დარბაზში, მონაწილეობდნენ უშაკის გუბერნატორი, დოქტორი თურან ერგიუნი, უშაკის პროვინციის პროტოკოლის წარმომადგენლები, უნივერსიტეტის რექტორი პროფესორი ეკრემ სავაში, პარტნიორი უნივერსიტეტების ხელმძღვანელი პირები.

უნივერსიტეტის რექტორმა, ფაკულტეტების დეკანებმა, უნივერსიტეტის საერთაშორისო ურთიერთობების სამსახურის ხელმძღვანელმა მონაწილეებს წარუდგინეს ვრცელი ინფორმაცია უნივერსიტეტის საქმიანობის, მათ შორის გაცვლითი პროგრამებისა და საერთაშორისო თანამშრომლობის შესახებ. 5-დღიანი დატვირთული პროგრამა მოიცავდა სხვადასხვა აქტივობებს, როგორიცაა პერსონალის სწავლება, ტრენინგები, პრეზენტაციები, სემინარები, მასტერ-კლასები, პანელური დისკუსიები, კულტურული ღონისძიებები.

კვირეულის მსვლელობისას მონაწილეებმა მიიღეს ინფორმაცია უმაღლესი განათლების ხარისხის უზრუნველყოფის მეთოდების, სტრატეგიების და საუკეთესო პრაქტიკების შესახებ, აგრეთვე გააზიარეს საკუთარი გამოცდილება. ხაზგასმით აღინიშნა, რომ ხარისხის უზრუნველყოფის პროცესი მოიცავს საგანმანათლებლო და სამეცნიერო-კვლევითი საქმიანობის კომპლექსურ შესწავლას, რომლის მიზანია ხარისხის შენარჩუნება და გაუმჯობესება, მისი სამართლიანობის და ეფექტიანობის მიღწევა. ხარისხის უზრუნველყოფის საიმედო მექანიზმების ჩამოყალიბება ძალზედ აუცილებელია მაღალი ხარისხის ინკლუზიური განათლების მხარდასაჭერად, რის შესახებაც იმსჯელეს თურქეთის უმაღლესი განათლების ხარისხის საბჭოს (YÖKAK), TUBITAK-ის, თურქეთის ეროვნული სააგენტოს, Kadir Has უნივერსიტეტის და იზმირის მაღალი ტექნოლოგიების უნივერსიტეტის ექსპერტებმა და წარმომადგენლებმა.

პროფ. მ. ჭელიძემ კვირეულზე წარმოადგინა პრეზენტაცია სტუ-ს და ბიზნესტექნოლოგიების ფაკულტეტის ისტორიის, მისიის, სტრუქტურული ერთეულების, მიმდინარე აქტივობების და სამომავლო გეგმების შესახებ.

დასასრულს, როგორც უშაკის უნივერსიტეტის, ისე ღონისძიებაში მონაწილე სხვა უნივერსიტეტების მხრიდან გამოითქვა საქართველოს ტექნიკურ უნივერსიტეტთან თანამშრომლობის სურვილი, დაიგეგმა სამომავლო აქტივობები.