11/01/2022
სტუ ბიზნესტექნოლოგიების ფაკულტეტის პროფესორების მონაწილეობა
პარტნიორი უნივერსიტეტის კონფერენციაში
2022 წლის 30 სექტემბერს - 1 ოქტომბერს აკაკი წერეთლის სახელმწიფო უნივერსიტეტის ბიზნესის, სამართლისა და სოციალურ მეცნიერებათა ფაკულტეტზე ჩატარდა ფაკულტეტის 30 წლის იუბილესადმი მიძღვნილი მეხუთე საერთაშორისო კონფერენცია „თანამედროვე განვითარების ეკონომიკური, სამართლებრივი და სოციალური პრობლემები“.
საქართველოს ტექნიკური უნივერსიტეტის ბიზნესტექნოლოგიების ფაკულტეტიდან კონფერენციის მუშაობაში მონაწილეობა მიიღეს ფაკულტეტის დეკანმა, პროფესორმა რუსუდან ქუთათელაძემ, პროფესორმა მედეა ჭელიძემ და ასოცირებულმა პროფესორმა მზევინარ ნოზაძემ (ნაშრომი „კომერციული ბანკის ეკონომიკური უსაფრთხოება თანამედროვე პირობებში“), აგრეთვე პროფესორებმა რატი ბურდიაშვილმა და გიორგი ცაავამ (ნაშრომი „გლობალური ინოვაციური ინდექსის სტრუქტურა, ქვეყნიური კლასიფიცირება და ინოვაციების კომერციალიზაციის ინდექსის დონის შეფასების გაანგარიშების მეთოდიკა“).
კონფერენცია და საიუბილეო კვირეული გახსნეს აკაკი წერეთლის სახელმწიფო უნივერსიტეტის რექტორმა როლანდ კოპალიანმა და ბიზნესის, სამართლისა და სოციალურ მეცნიერებათა ფაკულტეტის დეკანმა ნანა შონიამ. ღონისძიებაში მონაწილეობდნენ რექტორის მოადგილე შალვა კირთაძე, ქუთაისის საკრებულოს თავმჯდომარე ირაკლი შენგელია, სემეკის თავმჯდომარე დავით ნარმანია, გაეროს ბავშვთა ფონდის წარმომადგენელი საქართველოში ღასან ხალილი, პარტნიორი ორგანიზაციებისა და უნივერსიტეტების წარმომადგენლები.
სტუ ბიზნესტექნოლოგიების ფაკულტეტის სახელით აკაკი წერეთლის სახელმწიფო უნივერსიტეტის ბიზნესის, სამართლისა და სოციალურ მეცნიერებათა ფაკულტეტს იუბილე მიულოცეს ფაკულტეტის პროფესორმა, სტუ სენატის წევრმა მედეა ჭელიძემ და ასისტენტ პროფესორმა გოჩა აბუთიძემ.
