05/18/2021
საქართველოს ტექნიკური უნივერსიტეტისა და ზაარბრუკენის გამოყენებითი მეცნიერებების უნივერსიტეტებს შორის გაფორმებული მემორანდუმის საფუძველზე, ბიზნეს ტექნოლოგიების ფაკულტეტის საჯარო მმართველობისა და ელექტრონული ბიზნესის დეპარტამენტის სამი წარჩინებული სტუდენტი: ელენე საღარაძე, ლიდია კაცაძე და სოფო ხუციშვილი 12 აპრილიდან ესწრებიან ონლაინ ინგლისურენოვან ლექციებს ზაარბრუკენის გამოყენებითი მეცნიერებების უნივერსიტეტში. ისინი გერმანელი სტუდენტების მსგავსად ჩართულები არიან დავალებებისა და პროექტების მომზადებაში, სარგებლობენ უნივერსიტეტის მრავალფეროვანი ბიბლიოთეკითა და სხვა მასალებით. სწავლის წარმატებით დასრულების შემდეგ ზაარბრუკენის უნივერსიტეტი მათ სახელზე გასცემს შესაბამის ოფიციალურ დოკუმენტს.
ამჟამად ქართველი სტუდენტები: საერთაშორისო მარკეტინგის, ევროკავშირისა და საერთაშორისო სამართლის და ასევე ბიზნეს ინგლისურის საგნებს გადიან თიმზში. ჩვენი სტუდენტები უსვამენ კითხვებს გერმანელ ლექტორებს და თავისუფლად აფიქსირებენ თავიანთ მოსაზრებას ლექციის მსვლელობის დროს.
ასეთი შესაძლებლობა ბიზნესტექნოლოგიების ფაკულტეტის საჯარო მმართველობისა და ელექტრონული ბიზნესის დეპარტამენტის სტუდენტებს უკვე მეორე სემესტრია აქვთ. მათ ზაარბრუკენის უნივერსიტეტში მოხვედრასა და ყველა საჭირო დოკუმენტის მომზადებაში ეხმარებათ საქართველოს ტექნიკური უნივერსიტეტის პროფესორი, სოციალური მეცნიერებების დოქტორი, თინათინ იაშვილი.
