2020 წლის 27-28 თებერვალს, სტუ-ს ინოვაციების ცენტრისა და პროფესიული განვითარების ცენტრის თანამშრომლობით, ჩატარდა ინოვაციური პედაგოგიკის განვითარების ტრენინგკურსი: „შებრუნებული საკლასო ოთახი“- ს (Active Learning in the Flipped Classroom) მეთოდი და ღია საგანმანათლებლო რესურსები (OER) ინოვაციურ პედაგოგიკაში“. ტრენინგი მიზნად ისახავდა სტუ-ში ინოვაციური პედაგოგიკის პოპულარიზაციასა და განვითარებას, სწავლა/სწავლების ინოვაციური მეთოდების დანერგვის წახალისებას და ამგვარად, პროფესორ მასწავლებელთა პროფესიული განვითარებისათვის დამატებითი შესაძლებლობების შეთავაზებას.
ტრენინგში მონაწილეობა მიიღეს ბიზნესტექნოლოგიების ფაკულტეტის პროფესორ-მასწავლებლებმა, რომლებიც აქტიურად იყვნენ ჩართული სხვადასხვა სახის ჯგუფურ თუ ინდივიდუალურ აქტივობებში. ტრენინგკურსის ფარგლებში ისინი გაეცნენ ინოვაციური პედაგოგიკისათვის და აქტიური სწავლებისათვის მნიშვნელოვან საკითხებს თეორიულ და პრაქტიკულ საკითხებს, მაგალითად, აქტიური სწავლების სტრატეგიებს, აუდიტორიასთან ინტერაქციული კონტაქტის დამყარების სისტემას sli.do-ს; ღია განათლების არსს, მნიშვნელობასა და როლს; ასევე ღია საგანმანათლებლო რესურსების რაობას, მნიშვნელობას, ძლიერ და სუსტ მხარეებს შესაძლებლობებს და ა.შ; ღია საგანმანათლებლო რესურსების შექმნის პრინციპებსა და ღია ლიცენზიის, კერძოდ “Creative Commoms” –ს ფუნქციასა და ნიშნებს. ტრენინგის ფარგლებში განხორციელდა არაერთი აქტივობა, ტრენინგის დასასრულს კი მონაწილეებს გადაეცათ სერტიფიკატები.