საქართველოს ტექნიკური უნივერსიტეტის ბიზნესტექნოლოგიების ფაკულტეტის ხარისხის უზრუნველყოფის სამსახურის ორგანიზებით ფაკულტეტის სტუდენტებისა და კურსდამთავრებულების, ასევე, ახალგაზრდა მეწარმეთა ცენტრის აბიტურიენტების მონაწილეობით კარიერული განვითარების და გლობალური დასაქმების ფორუმი გაიმართა ა/წ 19 ნოემბერს სასტუმრო „ბილტმორ თბილისში“, რომელიც „კარიერული განვითარების საერთაშორისო ასოციაციის“ და „საფრანგეთის კარიერული განვითარების ასოციაციის“ ფორუმის ანალოგია. აღნიშნული ფორუმი საქართველოში ჩატარდა პირველად, რომლის მიზნებია:
ადამიანური კაპიტალის შრომით ბაზარზე განვითარება;
კვალიფიციური და მოტივირებული სპეციალისტების თვისობრივი და რაოდენობრივი ზრდა;
სტაჟირების პროგრამების და დასაქმების ხელშეწყობა;
სტუდენტური დასაქმება ან/და სტაჟირება;
აბიტურიენტების ინფორმირება ქართულ შრომით ბაზარზე არსებული მდგომარეობის და უნივერსიტეტების სტუდენტური, მათ შორის კარიერული სერვისების შესახებ.
პროექტი აქცენტირებული იყო 16-დან 40-წლამდე პიროვნებების დასაქმებასა და სტაჟირებაზე.
ფორუმის განმავლობაში ჩატარდა მასტერკლასები თემებზე: ფსიქოლოგიის როლი კარიერულ განვითარებაში, რეზიუმეს სწორად შევსება, გასაუბრების ტექნიკები, პერსონალური ეფექტურობის ფსიქოლოგია: მიზნების დასახვა და დროის ეფექტიანად გამოყენება; „ბარიერები ახალგაზრდების დასაქმებისას ქართულ შრომით ბაზარზე“ კვლევის შედეგები და სხვ.
ფორუმზე წარმოდგენილი იყო საქართველოში მოღვაწე 50 მსხვილი დამსაქმებელი, მათ შორის სახელმწიფო და კერძო სექტორი.
ფორუმის შესახებ ინფორმაცია გავრცელდა რამდენიმე საკომუნიკაციო არხით.
მედია პარტნიორები: პროექტის მხარდამჭერები იყვნენ საქართველოს წამყვანი ტელევიზიები, რადიო სადგურები და ინტერნეტ გაზეთები. მათი უდიდესი ნაწილი ამავდროულად პროექტის მონაწილე - დამსაქმებლის სტატუსითაც იყვნენ წარმოდგენილი.