2020 წლის თებერვალში ტექნოპარკში გაიმართება ბიზნეს ქეისების შეჯიბრი, რომელიც ათამდე წამყვანი უნივერსიტეტის სტუდენტებს გააერთიანებს. აღნიშნული შეჯიბრი უკვე მეორედ ხორციელდება საკონსულტაციო კომპანია TBSC-ის ინიციატივითა და უმაღლესი სასწავლებლების თანაორგანიზებით. პროექტის ფარგლებში, შეჯიბრი ჩატარდება ორ რაუნდად, სადაც მეორე რაუნდში, ფინალურ ღონისძიებაზე წარსდგება მხოლოდ ხუთი ფინალისტი უნივერსიტეტი. სტუდენტთა გუნდებს თითოეულ რაუნდში წინასწარ გადაეცემა ჰარვარდის უნივერსიტეტის ბიზნეს ქეისი და ორი კვირა მიეცემათ, რათა გადაწყვიტონ ქეისში მოცემული პრობლემები.
მეორე რაუნდს შეაფასებენ საქართველოში მოღვაწე უმაღლესი რგოლის მენეჯერები და მთავრობის წარმომადგენლები. გამარჯვებულ გუნდებს კი ფულად პრიზებს (2000-დან 8000 ლარამდე) გადასცემენ ბიზნეს სექტორის წარმომადგენლები. ბიზნეს ქეისების შეჯიბრის მიზანია ასწავლოს სტუდენტებს რეალური ბიზნეს პრობლემების გადაწყვეტა და ანალიტიკური აზროვნება.
დაჯილდოების ცერემონია დასრულდება ფურშეტით, სადაც სტუდენტებს სახელმწიფო სტრუქტურებისა თუ მსხვილი ბიზნეს კომპანიების წარმომადგენლებთან პირადად გასაუბრების საშუალება მიეცემათ.
გთხოვთ, ბაკალავრიატის და მაგისტრატურის ბიზნესის ადმინისტრირების საგანმანათლებლო პროგრამის სტუდენტებს, რომლებსაც სურთ აღნიშნულ ღონისძიებაში მონაწილეობა, 30 ნოემბრამდე ფაკულტეტის ხარისხის უზრუნველყოფის სამსახურში (სტუ-ს მეექვსე კორპუსი, მეშვიდე სართული, 707ა აუდიტორია) შეავსოთ შესაბამისი განაცხადი.

სტუ-ს ბიზნესტექნოლოგიების ხარისხის უზრუნველყოფის სამსახური