პროგრამები ქართული უმაღლესი სასწავლებლების ინტერნაციონალიზაციისათვის

DAAD - გერმანიის აკადემიური გაცვლის სამსახურმა 2019 წლის 27 ივნისს უმაღლესი სასწავლო დაწესებულებებისათვის განხორციელებული პროგრამებისა და პროექტების პრეზენტაცია წარადგინა სასტუმრო Ambassadori-ში.
საქართველოს ტექნიკური უნივერსიტეტის ბიზნესტექნოლოგიების ფაკულტეტის აკადემიურმა პერსონალმა საგანმანათლებლო პროგრამების განვითარების ფარგლებში აღნიშნულ ღონისძიებაში მიიღო მონაწილეობა, შეხვედრა ხელს შეუწყობს აკადემიური პროგრამების ინტერნაციონალიზაციის მიმართულებით განვითარებას, სტუდენტების, აკადემიური და მოწვეული პერსონალის მობილობას, ერთობლივი პროგრამების შემუშავებას.
DAAD - გერმანიის აკადემიური გაცვლის სამსახური, ინდივიდუალური სტიპენდიების გარდა, რომელსაც ის გამორჩეული სტუდენტების, კურსდამთვარებულებისა და მეცნიერებისთვის გასცემს, სტრატეგიულ მიზნად ისახავს, მონაწილეობა მიიღოს ქვეყანაში და მის ფარგლებს გარეთ საუნივერსიტეტო სტრუქტურების ჩამოყალიბებაში, მობილობისა და დიალოგის გზით ხელი შეუწყოს კვლევისა და სწავლების დონის ამაღლებას.
უმაღლესი სასწავლებლების ინტერნაციონალიზაციის მიზნით, გერმანიის აკადემიური გაცვლის სამსახური ყოველწლიურად 100-მდე სასტიპენდიო პროგრამაზე აცხადებს კონკურსს. DAAD - ის მიერ პარტნიორული პროგრამების დაფინანსება ბოლო წლების განმავლობაში საგრძნობლად გაიზარდა. 2017 წელს, ამგვარი პროექტების ფარგლებში მსოფლიო მასშტაბით 41,840 უცხოელი დაფინანსდა, ინდივიდუალური სტიპენდია კი 16,973 უცხოელმა მეცნიერმა და სტუდენტმა მიიღო.