საქართველოს ტექნიკური უნივერსიტეტის ბიზნესტექნოლოგიების ფაკულტეტმა დაასრულა ექსკლუზიური პროექტის – „ახალგაზრდა მეწარმეთა ცენტრის“ – პირველი, საგაზაფხულო, ეტაპი. ექსპრესკურსი „რა არის ბიზნესი“ ბიზნესტექნოლოგიების ფაკულტეტზე თბილისისა და რუსთავის სხვადასხვა სკოლების 54-მა მოსწავლემ გაიარა – ეს არის სოციალური პროექტის ერთთვიანი კურსი, რომლის მიზანია ახალგაზრდებს, რომლებიც პერსპექტივაში შეიძლება გახდნენ ბიზნესტექნოლოგიების ფაკულტეტის სტუდენტები, შეასწავლონ ბიზნესის საფუძვლები, რაც სამომავლოდ, სტუდენტობისას, აუცილებლად გამოადგებათ პროფესიის უკეთ დაუფლებაში.