„ზაარლანდის ტექნიკისა და ეკონომიკის უნივერსიტეტის“ პროფესორ ვილჰელმ ჰაუზერის ლექცია საქართველოს ტექნიკურ უნივერსიტეტში

„ზაარლანდის ტექნიკისა და ეკონომიკის უნივერსიტეტის“ პროფესორმა ვილჰელმ ჰაუზერმა, 2019 წლის 24 მაისს, საქართველოს ტექნიკური უნივერსიტეტის ბიზნესტექნოლოგიების ფაკულტეტის სტუდენტებთან წაიკითხა ლექცია თემაზე – „ლოგისტიკის სფეროს აქტუალური პრობლემები გერმანიაში“. პროფესორმა ვილჰელმ ჰაუზერმა ლექციაზე დეტალურად განიხილა საჰაერო გადაზიდვებთან დაკავშირებული აქტუალური საკითხები. 

პროფ. ჰაუზერმა აღნიშნა, რომ საჰაერო გადაზიდვების ბაზარი ერთ–ერთი ყველაზე სწრაფად მზარდია გერმანიაში. პროფ. ჰაუზერმა მიმოიხილა მსოფლიოში არსებული სხვადასხვა ტიპის აეროპორტები და მათი პოტენციური სიმძლავრეები. ასევე, აღნიშნა, რომ თანამედროვე აეროპორტებს თავიანთ მფლობელობაში არსებული ასაფრენი ბილიკების რაოდენობისა და ტერიტორიული განთავრების მიხედვით, შეუძლიათ წელიწადში 180 000–დან 330 000–მდე საჰაერო რეისის განხორციელება.
პროფ. ჰაუზერმა სტუდენტებთან ასევე ისაუბრა აეროპორტებში დროითი განრიგის დაგეგმვის შესახებ და სტუდენტებს განუმარტა როგორც „აეროპორტების სლოტების“ ასევე „საჰაერო სლოტების“ მოპოვებასთან დაკავშირებული რეგულაციები. აღსანიშნავია, რომ პროფ. ჰაუზერმა სტუ–ს ბიზნესტექნოლოგიების ფაკულტეტის სტუდენტებს გააცნო მსოფლიოს მასშტაბით არსებული აეროპორტების სიმძლავრეები როგორც მგზავრთა გადაყვანის, ასევე ტვირთების გადაზიდვის კუთხით. ლექციის ბოლოს, პროფ. ჰაუზერმა სტუდენტებთან განიხილა პრაქტიკული მაგალითი, თუ როგორ შეიძლება განხორციელდეს ოპტიმალურად ექსპრეს–გადაზიდვა საჰაერო ლოგისტიკაში ევროპიდან ამერიკის კონტინენტზე.
ლექციას ესწრებოდნენ სტუ–ს „ბიზნესტექნოლოგიების ფაკულტეტის“ ბაკალავრიატის საფეხურის სტუდენტები და პროფესორ–მასწავლებლები. ლექციამ დაიმსახურა სტუდენტების დიდი მოწონება. ლექციის ბოლოს პროფ. ჰაუზერმა უპასუხა სტუდენტების შეკითხვებს და გაიმართა დისკუსია.