საქართველოს ტექნიკური უნივერსიტეტის ბიზნესტექნოლოგიების ფაკულტეტის სტუდენტური თვითმმართველობის ორგანიზებით და ფაკულტეტის ადმინისტრაციის მხარდაჭერით დაბა ბაკურიანში განხორციელდა პროექტი "ზამთრის სკოლა".
პროექტის ფარგლებში სტუდენტებს შეხვდა ბიზნესტექნოლოგიების ფაკულტეტის დეკანი პროფესორი რუსუდან ქუთათელაძე, რომელმაც აუდიტორიას გააცნო ფაკულტეტის მიერ ჩატარებული სამუშაოს წლიური ანგარიში და ისაუბრა სამომავლო გეგმებზე.
საქართველოს ტექნიკური უნივერსიტეტის კანცლერი ქალბატონი ქეთი ქოქრაშვილი სტუდენტებს ესაუბრა ბიუჯეტის შედგენის წესსა და სტუ-ს 2019 წლის ბიუჯეტზე. სტუდენტებს გააცნო თუ რა არის უნივერსიტეტის ბიუჯეტი, შემოსულობები, გადასახდელები, ბიუჯეტის დაფინანსების წყაროები. თუ როგორ ხდება ბიუჯეტის პროექტის მომზადება, წარდგენა და დამტკიცება.
სტუდენტებს საჯარო ლექცია ჩაუტარა ბიზნესისა და სამართლის ინსტიტუტის დირექტორმა პროფ. ანზორ აბრალავამ თემაზე „ბიზნესის სოციალიზაცია და ეკონომიკის თანამედროვე პრობლემები“.
ასოც. პროფესორმა დავით ლელაძემ სტუდენტებთან ჩაატარა ტრენინგი „დროის მენეჯმენტსა და გუნდურ მუშაობაზე“, ტრენინგის ფარგლებში შედგა საინტერესო გუნდური თამაშები, სადაც მონაწილეებმა გამოავლინეს პიროვნული განვითარების უნარ-ჩვევები.