ბიზნესტექნოლოგიების ფაკულტეტის ასოცირებული პროფესორის მონაწილეობა საერთაშორისო კონფერენციაში

2018 წლის 4-6 ოქტომბერს საქართველოს ტექნიკური უნივერსიტეტის ბიზნესტექნოლოგიების ფაკულტეტის ასოცირებულმა პროფესორმა მედეა ჭელიძემ მონაწილეობა მიიღო სანკტ-პეტერბურგის სახელმწიფო უნივერსიტეტის მენეჯმენტის უმაღლესი სკოლის მიერ ორგანიზებულ V საიუბილეო საერთაშორისო სამეცნიერო კონფერენციაში „GSOM განვითარებადი ბაზრები 2018“ („GSOM EMC 2018“), სადაც მიწვეული იყო მომხსენებლად სექციაში „სტრატეგიული ფინანსები და კორპორაციული მმართველობა“.
აღნიშნული კონფერენცია უმნიშვნელოვანესი მოვლენაა სანკტ-პეტერბურგის სახელმწიფო უნივერსიტეტისა და მენეჯმენტის უმაღლესი სკოლის აკადემიურ და სამეცნიერო ცხოვრებაში. იგი წარმოადგენს სამეცნიერო დისკუსიების, აქტუალური იდეების, აზრთა და გამოცდილების გაზიარების მნიშვნელოვან პლატფორმას განვითარებადი ბაზრების კონტექსტში. კონფერენციის სამუშაო ენაა ინგლისური.
2018 წელს მომხსენებლებად მიწვეული იყვნენ 150 მონაწილე, ხოლო სესიებში, დისკუსიებში, მრგვალ მაგიდებსა და სემინარებში მონაწილეობა მიიღო 350 მკვლევარმა, მეცნიერმა, აკადემიურმა პერსონალმა და ბიზნესმენმა მსოფლიოს 28 ქვეყნიდან. 2014-2017 წლებში ღონისძიებას დაესწრო 1300-ზე მეტი მონაწილე.
კონფერენციის მსვლელობისას მასპინძელი სასწავლო დაწესებულების წარმომადგენლების და მონაწილეების მხრიდან გამოითქვა აქტიური ურთიერთთანამშრომლობის მზადყოფნა, რაც გულისხმობს, მათ შორის, მონაწილეობის მიღებას საქართველოს ტექნიკური უნივერსიტეტის მიერ ორგანიზებულ მსგავს ღონისძიებებში და სხვა აქტივობებს.