English |
Русский |
დეპარტამენტები
ძებნა |
საიტის რუკა |
კონტაქტი
ბიზნესტექნოლოგიების ფაკულტეტის სტუდენტის წარმატება
ბიზნესტექნოლოგიების ფაკულტეტის სტუდენტმა გოგა გელიტაშვილმა საკმაოდ მკაცრი შერჩევის პროცედურების გავლის შედეგად უფლება მოიპოვა მონაწილეობა მიიღოს გაეროს მიერ ორგანიზებულ ახალგაზრდულ ფორუმში „UNCTAD Youth Forum 2018“, რომელიც გაიმართება ერთა სასახლეში, ჟენევაში 2018 წლის 22-26 ოქტომბერს.
აღნიშნულ მნიშვნელოვან ახალგაზრდულ ფორუმში მონაწილეობისთვის შეირჩევა დაახლოებით 200 ახალგაზრდა მთელი მსოფლიოდან, რომლებიც დაინტერესებული არიან ინვესტიციების, ვაჭრობის, განვითარების პრობლემებით, ასევე გამოცდილების, იდეებისა და მოწინავე მეთოდების გაცვლით.
2018 წელს ახალგაზრდული ფორუმი გაიმართება „UNCTAD - მსოფლიო საინვესტიციო ფორუმი 2018“-ის ფარგლებში, რომელიც წარმოადგენს უმნიშვნელოვანეს გავლენიან მსოფლიო შეხვედრას ინვესტიციების სფეროში პოლიტიკის შემუშავების კუთხით. მასში მონაწილეობენ სახელმწიფოთა ლიდერები, მთავრობათა მეთაურები, პარლამენტარები, მინისტრები, აღმასრულებელი დირექტორები და საერთაშორისო ორგანიზაციების ხელმძღვანელები, გავლენიანი ინვესტორები, მეცნიერები, საპენსიო ფონდების და სუვერენული ფონდების ხელმძღვანელები, საერთაშორისო დონის საინვესტიციო ექსპერტები, საქმიანი წრეებისა და არასამთავრობო ორგანიზაციების წარმომადგენლები.
ახალგაზრდული ფორუმის მიზანია მსოფლიოს მომავალ ლიდერებს შორის გამოცდილების გაზიარება და კავშირების დამყარება, მდგრადი განვითარების მიზნების მიღწევაში მონაწილე გლობალურ მოთამაშეებთან დიალოგის გამართვა, ცნობიერების ამაღლება UNCTAD-ის საქმიანობისა და ახალგაზრდებთან დაკავშირებული პროექტების შესახებ, ადგილობრივი და გლობალური პრობლემების გადაჭრაში ახალგაზრდობის ჩართულობის ამაღლების შესახებ დისკუსიის გამართვა და სხვა.
ახალგაზრდული ფორუმის ფარგლებში ჩატარდება სემინარები, პლენარული სხდომები, სექციური მუშაობა, სამუშაო შეხვედრები და სხვა საინტერესო ღონისძიებები. ახალგაზრდული ფორუმის მონაწილეები შეძლებენ მონაწილეობა მიიღონ „UNCTAD - მსოფლიო საინვესტიციო ფორუმი 2018“-ის ფარგლებში გამართულ მსოფლიო ლიდერების საინვესტიციო სამიტებში, მრგვალ მაგიდებში, მინისტრებისა და საქმიანი წრეების წარმომადგენელთა ორმხრივ და მრავალმხრივ დიალოგებში, სამეცნიერო წრეებსა და კერძო სექტორს შორის გამართულ დისკუსიებში, დაჯილდოვების ცერემონიაში (მ.შ. „ქალები ბიზნესში 2018“), ასევე სხვა ღონისძიებებში, რომლებიც გაშუქდება საერთაშორისო მედიის მიერ.
ვულოცავთ ჩვენს სტუდენტს ამ წარმატებას!