18-11-2019 „მეცნიერების საერთაშორისო დღე მშვიდობისა და განვითარებისთვის“ საქართველოს მეცნიერებათა ეროვნულ აკადემიაში 8 ნოემბერს აღინიშნა. საზეიმო ღონისძიება, რომელიც ტრადიციულ ხასიათს ატარებს, წელს, სოფლის მეურნეობის მეცნიერებათა აკადემიასთან ერთად გაიმართა. 

სხდომა მეცნიერებათა ეროვნული აკადემიის პრეზიდენტმა, აკადემიკოსმა გიორგი კვესიტაძემ  გახსნა და საქართველოს სამეცნიერო წრეებს მნიშვნელოვანი თარიღი მიულოცა. როგორც მან აღნიშნა, მეცნიერების საერთაშორისო დღე თანამედროვე საზოგადოებაში მეცნიერებისა და მეცნიერთა მნიშვნელოვან როლზე აკეთებს აქცენტირებას და ახალი სამეცნიერო საკითხების განხილვაში საზოგადოების ჩართულობის აუცილებლობას უსვამს ხაზს. 

დამსწრე საზოგადოებას სოფლის მეურნეობის აკადემიის პრეზიდენტი, აკადემიკოსი გურამ ალექსიძე მიესალმა. მან ყოველდღიურ ცხოვრებაში მეცნიერების მნიშვნელობასა და აქტუალობაზე გაამახვილა ყურადღება. 

სამეცნიერო წრეებს ღირსშესანიშნავი თარიღი, საქართველოს საპატრიარქოს სახელით, პროტოპრესვიტერმა მამა გიორგი ზვიადაძემ მიულოცა და სრულიად საქართველოს კათალიკოს-პატრიარქის, უწმინდესისა და უნეტარესის, ილია II-ის კეთილი სურვილები გადასცა. 

ქართველ მეცნიერებს მნიშვნელოვანი დღე მიულოცა და ხელისუფლების მხრიდან სრული მხარდაჭერა აღუთქვა საქართველოს პარლამენტის თავმჯდომარემ არჩილ თალაკვაძემ. როგორც მან აღნიშნა, მნიშვნელოვანია მეცნიერების უახლესი მიღწევების შესახებ საზოგადოების, განსაკუთრებით კი ახალგაზრდა თაობის მუდმივად ინფორმირება, რაც ხელს შეუწყობს სამეცნიერო მიღწევებისა და კვლევების მიმართ საზოგადოების დაინტერესების გაზრდას. 

საზეიმო ღონისძების დასასრულ, წარმატებულ მეცნიერებს საპატიო სიგელები გადასცეს. დაჯილდოებულთა შორის არიან საქართველოს ტექნიკური უნივერსიტეტის პროფესორები: ელმირა (დოდო) ჩხიკვაძე - ელექტროქიმიის დარგში, ლერი გვასალია - ქიმიისა და ქიმიური ტექნოლოგიების დარგში, თამარ კაჭარავა - აგროტექნოლოგიის დარგში, გივი გავარდაშვილი - ჰიდრომელიორაციის დარგში. 

UNESCO-ს მიერ 2001 წელს დარსებული „მეცნიერების საერთაშორისო დღე მშვიდობისა და განვითარებისათვის“, ყოველწლიურად, ნოემბერში აღინიშნება. ეს დღე დაარსდა მეცნიერების მსოფლიო კონფერენციაზე, რომელიც 1999 წელს, ბუდაპეშტში (უნგრეთი), UNESCO-ს ეგიდით, მეცნიერების საერთაშორისო კავშირმა ჩაატარა. მას შემდეგ, მეცნიერების დღის ფარგლებში, მრავალი ახალი კონკრეტული პროექტი და პროგრამა განხორციელდა.

 

ყველა სიახლე